फोकस नेपाल ,धनुषा  । धनुषामा एक गरिब परिवारलाई एक बहुसँख्यक परिवारले ज्यादती गरेको घटना बाहिरिएको छ ।

धनुषाको गणेशमानचारनाथ नगरपालिका वडा नं. ११ डुमरिया बस्ने टुनु ठाकुरको घरमा सोही स्थान बस्ने हेडमास्टर समेत रहेका शम्भु यादवले डोजर चलाएर उठीवास गराएको घटना बाहिरिएको छ ।

शुभकामना

गाउँ ब्लकको जग्गामा विगत २५ बर्षदेखि भोगचलन गर्दै आएका टुनु ठाकुरलाई जमिन जबरदस्ती आफूलाई दिन दबाब दिदै आएकोमा नदिएपछि उनले बाहिरबाट मान्छेहरु मगाएर डोजर चलाइदिएको गुनासो पीडित परिवारले पोखेका छन् ।

टुनु ठाकुरको पछाडी शम्भु यादवको जमिन रहेकोमा टुनुलाई अगाडीको जग्गा जबरदस्ती आफूलाई दिनको लागि दबाब दिँदै आएका थिए । आफू बहुसँख्यक हुँ भनेर धाक धम्की दिँदै जमिन नदिए घर भत्काइदिने धम्की दिँदै आएका शम्भुले आफ्नो जातबालाहरुको मास मगाएर उनको घर भत्काइदिएको आरोप लगाएका छन् ।

गत शनिबार मास्क लगाएर शहिदनगरको बघवनबाट गएका केही मानिसहरु समेतको समूहले ठाकुरको घरमा बलपूर्वक डोजर चलाएको थियो । हारगुहार गर्दा पनि कसैले उनलाई बचाएनन् । डोजर चल्दा घरमै बाँधिएको दुई बाख्राको पाठो समेत मरेको टुनु ठाकुरकी श्रीमति बताउँछिन् ।

शम्भु यादवले विभिन्न गाउँबाट आफ्ना मान्छेहरु बोलाएका थिए । आफ्ना जातबालाहरुलाई बोलाएर घर तोडन लगाएको आरोप पीडित परिवारको छ । धनुषाको रघुनाथपुरस्थित विद्यालयमा हेडमास्टर रहेका शम्भु यादवले ठाकुर परिवारलाई उठीवास गराएको आरोप छ ।

ठाकुर परिवार अहिले त्रिपालमुनि रातभरि ८ जना परिवारसँग वास बस्न बाध्य भएका छन् । अहिले चिसो मौसममा घरबार बिहिन हुँदा ठाकुरको पुरै परिवार बिचल्लीमा परेका छन। न खाने अन्न छ न लगाउने लुगा, न सुत्न घर नै छन् । उनले समाजिक न्यायको लागि सबै पक्षसँग आग्रह गरिन् ।

यता, हेडमास्टर शम्भु यादवलाई सम्पर्क गर्न खोज्दा सम्पर्क हुन सकेनन् । जानकारी अनुसार, उनी त्यहाँबाट अर्कै ठाउँमा गएका हुन् ।