राजविराज । कोशी नदीमा पाइने दुर्लभ प्रजातिको माछा डल्फिनको शिकार भएको पाईएको छ । कोशी नदीमा माछा मार्ने एक मलाहले डल्फिनको शिकार गरेको पाईएको छ ।

कोशी नदी बग्ने भारतको बिहारस्थित सहरसा जिल्लाको नौहट्टा क्षेत्रमा कोशी नदीमा दुर्लभ गंगा नदी डल्फिनको शिकार गरिएको भिडियो भाईरल बनेको छ । डल्फिनको शिकार गरिएको भिडियो सामाजिक सञ्जालमा सार्वजनिक भएपछि प्रहरीले घटनाको अनुसन्धान सुरु गरेको छ ।

शुभकामना

कोशी नदीमा डल्फिनको शिकार गरेको आरोप एक मलाहमाथि लागेको छ । घटनासँग सम्बन्धित भिडियो सार्वजनिक भएपछि प्रहरीले आरोपितको पहिचान गरी खोजी थालेको हो ।

प्रहरीले घटनामा संलग्न भनिएका वीरेंद्र मुखिया नाम गरेका व्यक्तिको खोजी गरिरहेको जनाइएको छ । भिडियोमा मुखियाले डल्फिनलाई नियन्त्रणमा लिएको तथा त्यससँग सम्बन्धित गतिविधि देखिएको बताइएको छ । भिडियो सार्वजनिक भएपछि वन्यजन्तु संरक्षणसँग सम्बन्धित विषयमा समेत प्रश्न उठेको छ ।

गंगा नदी डल्फिन भारतको राष्ट्रिय जलीय जीव हो । यो दुर्लभ तथा संकटापन्न प्रजातिमा पर्छ । कोशी नदीमा समेत गंगा नदी डल्फिनको उपस्थिति रहेको अध्ययनहरूले देखाएका छन् ।

डल्फिन संरक्षणका क्षेत्रमा काम गर्ने संस्थाहरूका अनुसार कोशी नदीमा मानव गतिविधि, माछा मार्ने क्रममा हुने जोखिम तथा अन्य वातावरणीय दबाब यस प्रजातिका लागि चुनौती बन्दै आएका छन् ।

प्रहरीले सार्वजनिक भएको भिडियो र अन्य प्रमाणका आधारमा घटनाको अनुसन्धान अघि बढाएको छ । आरोपित व्यक्ति पक्राउ परेपछि डल्फिनको शिकार भएको हो वा होइन तथा घटनामा अन्य व्यक्तिको संलग्नता छ कि छैन भन्ने विषयमा थप स्पष्ट हुने प्रहरीले जनाएको छ ।

गंगा नदी डल्फिनलाई संरक्षण गर्न भारतमा कानुनी व्यवस्था रहेको छ । यसअघि पनि डल्फिनमाथि भएको हिंसात्मक घटनाको भिडियो सार्वजनिक भएपछि प्रहरीले संलग्न व्यक्तिहरूलाई पक्राउ गरेको उदाहरण छ ।

कोशी नदीमा डल्फिन देखिनु जैविक विविधताको दृष्टिले महत्वपूर्ण मानिन्छ । पछिल्लो घटनाले नदीमा दुर्लभ जलचरको संरक्षण तथा अवैध शिकार नियन्त्रणमा निगरानी थप कडा बनाउनुपर्ने आवश्यकता देखाएको छ ।